SUKNAAN (December 7, 2008)

SUKNAAN

Ni Bro. Socrates C. Fernandez

Date: December 7, 2008

Source: Bag-ong LUNGSORANON, Page 8

Topic: Santa Maria-Kanunay’ng Ulay

PANGUTANA:

Nganong moingon man kamo nga si Maria inahan ni Jesus, ulay kanunay? Dili ba si San Jose bana ni Maria ug kay magtiayon man sila, dili sala kon maghimo sila sa buhat sa magtiayon: Kini nahimo ni Jose kay giingon sa kasulatan, “Ug wala si Jose makighilawas kang Maria sa wala pa siya manganak kang Jesus, ang anak niya nga panganay,” (Mat. 1:25) Klaro, nga human manganak si Maria kang Jesus gihilabtan na ni Jose si Maria. Giingon usab nga si Jesus adunay manghud: “Dili ba kini si Jesus, ang panday, ang iyang inahan mao si Maria, ang iyang mga amahan mao si Jose? Ug ang iyang igsoon mao sila si Santiago, Judas, Jose ug si Simon ug ang iyang mga igsoong mga babaye ania man uban kanato?” (Mar. 6:3). Tubaga kini (Dan Cugtas, Lawaan II, Talisay City, Cebu).

TUBAG:

Gitagna nga usa ra si Jesus nga anak sa Iyang inahan nga mao si Maria, ug wala Siya’y manghud. Si Profeta Ezekiel miingon: “Ania ang usa ka pultahan, moagi niini ang Ginoong Dios sa Israel. Ug wala nay tawo nga moagi pa niini nga pultahan, kay kini pagasirhan na” (Ezek. 44:3). Ang mga lalawigan sa Palestina mao ang Judea, Samaria ug ang Idmea. Sila adunay mga ganghaan, apan daghan ang miagi ug misulod niini. Ang bugtong pultahan nga gipasabot nga giagian sa Ginoong Dios sa Israel mao ang tagoanggan ni Maria. Ug kini tak-opan na.

Ang giingon: “Wala hilabti ni Jose si Maria hangtud nga siya nag-anak kang Jesus nga iyang panganay,” Wala magpasabot nga dunay nahitabo human sa pagpanganak ni Maria. Kay sa Bibliya ang pulong “hangtud” wa’y gipasabot nga human sa okasyon nga gihangturan dunay sunod nga mahitabo: “Gipadala ni Noe ang uwak, apan wala na kini mobalik hangtud nahubas ang tubig,” (Gen. 8:7). Wala magpasabot nga human mahubas ang tubig mibalik ang uwak. Busa ang pag-ingon nga “Wala hilabti ni Jose si Maria hangtud nanganak kang Jesus,” nagpasabot nga bisan humana manganak si Maria kang Jesus, si Jose wala mohilabot kang Maria. Ang pulong hangtud maoy gigamit sa mga karaang Bibliya nga hubad bisan sa atong mga igsoong Protestante sa Mat. 1:25.

Ug kining giingon nga mga igsoon ni Jesus dili mga anak ni Jose ug ni Maria. Ang ilang ginikanan mao si Alfeo-Kleopas ug Maria usab ang ngalan sa iyang asawa (Luk. 6:13-16, Juan 19:25-26, Mar. 15:40). Gitawag sila ug igsoon ni Jesus, kay ang asawa ni Kleopas paryenti ra usab ni Santa Maria inahan ni Jesus, subay kini sa ilang kultura (Ezek 11:25, Roma 9:3). Ang pulong “panganay” nagkahulogan nga mao ang una nga miagi sa tagoangkan sa inahan, bisan pa og wala kini manghud (Exudos 13:1). Lahi sa kamagulangan, kay kini nagpasabot nga dunay mga manghud. Si Jesus gitawag og “panganay” sa mga balaan nga nagsunod sa kabubot-on sa Dios, apan dili sa pagkamagsoon sa unod, kay si Jesus wala may mga manghud, (Zacarias 12:10). “Sila nagbangotan tungod kaniya, ingon sa usa ka anak nga bugtong..iyang Anak nga panganay.”