Catholic Faith Defender

JOHN. 8:32 “et cognoscetis veritatem et veritas liberabit vos”

Archive for the ‘SUKNAAN (Visaya)’ Category

SUKNAAN (December 7, 2008)

Posted by catholicfaithdefender on March 20, 2009

SUKNAAN

Ni Bro. Socrates C. Fernandez

Date: December 7, 2008

Source: Bag-ong LUNGSORANON, Page 8

Topic: Santa Maria-Kanunay’ng Ulay


PANGUTANA:

Nganong moingon man kamo nga si Maria inahan ni Jesus, ulay kanunay? Dili ba si San Jose bana ni Maria ug kay magtiayon man sila, dili sala kon maghimo sila sa buhat sa magtiayon: Kini nahimo ni Jose kay giingon sa kasulatan, “Ug wala si Jose makighilawas kang Maria sa wala pa siya manganak kang Jesus, ang anak niya nga panganay,” (Mat. 1:25) Klaro, nga human manganak si Maria kang Jesus gihilabtan na ni Jose si Maria. Giingon usab nga si Jesus adunay manghud: “Dili ba kini si Jesus, ang panday, ang iyang inahan mao si Maria, ang iyang mga amahan mao si Jose? Ug ang iyang igsoon mao sila si Santiago, Judas, Jose ug si Simon ug ang iyang mga igsoong mga babaye ania man uban kanato?” (Mar. 6:3). Tubaga kini (Dan Cugtas, Lawaan II, Talisay City, Cebu).

TUBAG:

Gitagna nga usa ra si Jesus nga anak sa Iyang inahan nga mao si Maria, ug wala Siya’y manghud. Si Profeta Ezekiel miingon: “Ania ang usa ka pultahan, moagi niini ang Ginoong Dios sa Israel. Ug wala nay tawo nga moagi pa niini nga pultahan, kay kini pagasirhan na” (Ezek. 44:3). Ang mga lalawigan sa Palestina mao ang Judea, Samaria ug ang Idmea. Sila adunay mga ganghaan, apan daghan ang miagi ug misulod niini. Ang bugtong pultahan nga gipasabot nga giagian sa Ginoong Dios sa Israel mao ang tagoanggan ni Maria. Ug kini tak-opan na.

Ang giingon: “Wala hilabti ni Jose si Maria hangtud nga siya nag-anak kang Jesus nga iyang panganay,” Wala magpasabot nga dunay nahitabo human sa pagpanganak ni Maria. Kay sa Bibliya ang pulong “hangtud” wa’y gipasabot nga human sa okasyon nga gihangturan dunay sunod nga mahitabo: “Gipadala ni Noe ang uwak, apan wala na kini mobalik hangtud nahubas ang tubig,” (Gen. 8:7). Wala magpasabot nga human mahubas ang tubig mibalik ang uwak. Busa ang pag-ingon nga “Wala hilabti ni Jose si Maria hangtud nanganak kang Jesus,” nagpasabot nga bisan humana manganak si Maria kang Jesus, si Jose wala mohilabot kang Maria. Ang pulong hangtud maoy gigamit sa mga karaang Bibliya nga hubad bisan sa atong mga igsoong Protestante sa Mat. 1:25.

Ug kining giingon nga mga igsoon ni Jesus dili mga anak ni Jose ug ni Maria. Ang ilang ginikanan mao si Alfeo-Kleopas ug Maria usab ang ngalan sa iyang asawa (Luk. 6:13-16, Juan 19:25-26, Mar. 15:40). Gitawag sila ug igsoon ni Jesus, kay ang asawa ni Kleopas paryenti ra usab ni Santa Maria inahan ni Jesus, subay kini sa ilang kultura (Ezek 11:25, Roma 9:3). Ang pulong “panganay” nagkahulogan nga mao ang una nga miagi sa tagoangkan sa inahan, bisan pa og wala kini manghud (Exudos 13:1). Lahi sa kamagulangan, kay kini nagpasabot nga dunay mga manghud. Si Jesus gitawag og “panganay” sa mga balaan nga nagsunod sa kabubot-on sa Dios, apan dili sa pagkamagsoon sa unod, kay si Jesus wala may mga manghud, (Zacarias 12:10). Sila nagbangotan tungod kaniya, ingon sa usa ka anak nga bugtong..iyang Anak nga panganay.

Posted in Apologetics-Visayan, Santa Maria (Visaya), Socrates C. Fernandez, SUKNAAN (Visaya) | 1 Comment »

SUKNAAN (March 22, 2009)

Posted by catholicfaithdefender on March 17, 2009

SUKNAAN

Ni Bro. Socrates C. Fernandez

Date: March 22, 2009

Topic: Larawan

PANGUTANA:

Giingon ni Jesus, “Maingon nga si Moises nagpatindog ug halas sa kamingawan mao usab patindugon ang anak sa Tawo. Aron ang tanan mutuo Kaniya dili mawala kondili makaangkon sa kinabuhi nga walay katapusan,” (Juan 3:14). Mao ba kini nga ang gipasukaran sa mga Katoliko nga dunay larawan ni Kristo nga linansang sa krus diha sa inyong simbahan? Apan wala ba kini mahasumpaki sa giingon ni Jehova “Kay ang tanang mga dios sa mga katawhan mga larawan man…” (Sal. 96:5), dili ba klaro nga kadtong mga miingon nga naghupot silag larawan, kini nahimo nga ilang mga dios, sumala sa Bibliya?

TUBAG:

Ang gisulti ni Jesus usa ka sukaranan sa Katoliko bahin sa larawan. Matin-aw ang tumong sa Dios nga nagpahimo Siya ug larawan nga sinalsal o kinulit sa dagway sa anghel o kerubin ug larawan sa baalang mga tawo, kini nagsimbolo sa presensiya sa Dios.

Saysay sa Templo sa Dios. Ug kini hinimo, ang uban ang mga kerubin ug mga kahoy’ng palma, sa pagkaagi dihay nawong sa tawo nga nag-atubang sa kahoy’ng palma ug nawong sa batan-ong leon atubangan sa kahoy’ng palma,” (Ezek. 41:18-22). Ug ang GINOO nag-ingon, “Akong gipahiluna ang Akong kaugalingon sa kerubin,” (1 Cronicas 13:6). Ug gani sa diha nga gidala kini sa balay ni Obed-edom, ang balay ni Obed-edom napuno sa panalangin sa Dios, (1 Cron. 13:14).

Si Josue nga nag-ampo atubangan sa maong kaban o arka nga may larawan sa kerubin, wala siya mag-ampo sa kerubin kondili ngadto ni Yahweh nga Dios sa Israel: “Gigisi ni Josue ang iyang sapot ug mihapa atubangan sa kahon ni Yahweh uban sa mga anciano ug gibutangan nilag abo ang ilang ulo… siya miingon, “Oh Yahweh, among Ginoo, nganong kami Imong gidala dinhi tabok sa Jordan?…” (Josue 7:6-7).

Wala ipasimba sa Dios ang Iyang gipabuhat nga larawan ingon nga kini mao ang MATUOD NGA DIOS. Hinoon gisugo nga kini tahuron sa katawhan sa Dios. Tahura ninyo ang Akong santuario, kay Ako ang inyong GINOO,” (Lev. 19:30). Sa diha nga ang larawan sa bitin nga bronsi nga gigamit sa Ginoo nga kon sud-ongon kini makaluwas sa pinaakan sa mga tawo ilang gisimba, kini gipaputol-potul sa GINOO, ug gipatunaw (2 Hari 18:4).

Busa klaro nga ang Dios nagsugo nga dunay mga gipabuhat nga linilok nga larawan, ang kerubin ug mga balaan, apan dili kini ilhon nga Dios. Busa wala mahiapil ang katawhan sa Dios nga ilang mga larawan mao ang ilang dios (Sal. 96:5), kondili gitumong kadto sa Dios sa mga pagano. Giingnan sila sa Dios, “Sila pakaulawan gayud kanang nagsalig sa linilok nga larawan kanang nga-ingon sa tinunaw nga larawan: Kamo mao ang among mga dios,” (Isaias 42:17). Ug dili kini referedo sa mga Katoliko… “Our Catholic worship is not directed towards the images but to (God) whom they represent…” (Catechism of the Catholic Church No. 2132).

Posted in Apologetics-Visayan, Larawan (Visaya), Socrates C. Fernandez, SUKNAAN (Visaya) | Leave a Comment »

SUKNAAN (November 16, 2008)

Posted by catholicfaithdefender on March 13, 2009

SUKNAAN

Ni Bro. Socrates C. Fernandez

Date: November 16, 2008

Source: Bag-ong LUNGSORANON, Page 8

Topic: Bibliya ug Koran

PANGUTANA:

Dili ba usa ka dakong pangahas ang pang-angkon sa Iglesya Katolika nga ang Bibliya nagagikan Kaniya? Ang mga hubad sa Biblia diha na sa wala pa ang Iglesya Katolika. Dili ba tinuod nga ang libro sa mga Muslim nagsupak man sa Biblia bahin ni Cristo, isip Mesiyas? Hangtud karon ang Muslim, usa ka giila nila nga mao ang mensahero ni Alla mao si Mohammed. Unsay ikasulti mo niini. Miingon sila nga ang Islam mao ang tinuod nga gilitok ni Allah nga iyang gitukod, dili Kristyanidad?

TUBAG:

Dili usa ka pangahas sa Iglesya Katolika ang pang-angkon nga gikan niya ang Bibliya ang atong gibasa karon. Siya ang Iglesia Katolika ang naghipos sa mga basahon sa Daan ug Bag-ong Tugon ug ang miayag ug mipili kon hain gayod niini ang mga linamdagan sa Espiritu Santo. Si Martin Luther, ang bantugang magtutukod sa protestantismo miingon: “Kitang mga Protestante sa Iglesya Katolika angay nga moila niini, kita wala untay Bibliya kon wala pa ang Iglesia Katolika,” (Book Commentary on John Chap. XIV). Ang labing karaan nga hubad sa Biblia, ang Latina Vulgata, gilusad sa Iglesia Katolika sa tuig 382-404 A.D. (Halley’s Bible Handbook pahina 754, Protestant Book). Ang Iglesya Katolika sa iyang konsilyo sa Cartago, sa tuig 397 A.D. mao ang mihatag ug hukom sa 27 ka libro sa Bag-ong tugon ug wala nay ipuno pa. (Halley’s Bible Handbook pahina 746). Ang paghubad sa Bibliya sa mga Protestante ulahi na kaayo sa tuig 1611 A.D. sa mando ni Hari Jacob o King James Version sa Inglatera.

Luther in 1529 by Lucas Cranach

Ang Koran sa mga Muslim may mga Makita nga teksto nga naghatag og dakong pag-ila kang Jesus nga Mesiyah. “Si Isah (Jesus) gipamatud-an ni Alla og mga milagro,” (Sur. 3:86). “Ang dili moila kang Isah, (Jesus) nga usa ka propeta may dakong silot nga ipahamtang kaniya nga wala masukad mahitabo,” (Surah 5:114-115). “Apan kon sila moila kang Isah nga Mesiyah, may dakong panalangin ug kalooy si Allah alang kaniya, siya ug ang iyang inahan gipanalipdan ni Allah aron ang sala dili makatandog kanila” (Surah 19:19, Surah 3:36). “Naghatag si Allah og mga ilhanan kang Isah aron Siya makahimog mga milagro sapag-ayo sa mga masakiton ug sa pagbanhaw sa mga Minatay” (Sur. 3:49).

Ug ang relihiyon o tinuhoan nga tukoron ni Jesus, gimando ni Allah, “We commended unto Abraham, Moses and Jesus saying: Establish the religion and be not divided therein” (Surah 42:13). “Ang mga Judio ug ang mga Kristohanon ug ang mga Sabbaeans…ug mituo ni Alla ug nagabuhat og mayo, sa katapusang adlaw piho nga makadawat sila’g ganti uban sa ilang Ginoo,” (Surah 2:62).

Hinoon, tinuod nga ang mga Muslim wala moila ni mituo ni Cristo nga Dios, kondili sama ni Mohammed nga usa ka dakong propeta. Ang gitudlo sa Bibliya si Jesus Dios, mao ang gisupak sa KORAN sa mga Muslim.

Posted in Apologetics-Visayan, Biblia (Visaya), Socrates C. Fernandez, SUKNAAN (Visaya) | 3 Comments »

SUKNAAN (July 13, 2008)

Posted by catholicfaithdefender on March 11, 2009

SUKNAAN

Ni Bro. Socrates C. Fernandez

Date: July 13, 2008

Source: Bag-ong LUNGSORANON, Page 8

Topic: Santo Papa

PANGUTANA:

GIINGON nga ang lalaki ra man mapari o ma-Santo Papa sa mga Katoliko pero, ngano man nga duna may Santo Papa nga babaye nga ginganlan og si Papa Joana sa tuig 855 A.D. ug tuig 1100 A.D. Dili ba klaro nga kining Iglesia Katolika makasulod ang bisan babaye nga mahimong papa?

TUBAG:

DILI tinuod nga dunay Santo Papa nga babaye. Kining tinumotumo nga istorya gipalutaw sa duha ka Dominicano nga mao sila si John de Mailly ug si Stephen de Borbon nga mipahiluna sa kamandoan sa maong babaye sa tuig 1100 A.D. Ang lain mao ang istorya sa Papal Chambelain nga si Martin sa Troppa nga mipahiluna sa pagmando sa maong babaye sa tuig 855 A.D.

Giingon nga nagsugod kini dihang may gitaho nga dunay babaye nga Patriarka sa Constantinopla, pangulo sa mga Orthodox gitaho nga gisulti ni Papa Leo IX sa sulat ngadto ni Cerularius. Laing taho bahin sa babaye nga papa usa ka istorya aron sa pagbugal-bugal ni Teodora ug sa iyang duha ka mga anak nga babaye sa ikanapulo ka gatusan ka mga katuigan human mosaka si Cristo sa Langit.

Ang maong tinumo-tumo nga istorya gidawat-dawat bisan ngadto sa 15 ka gatusan ka tuig human sa pagsaka ni Cristo sa langit. Apan sa panahon ni Papa Pio II, tuig 1458-1468 A.D. ug sa Lives of the Popes, gisalikway kini ingon nga wala gayoy sukaranan sa History.

Ang mga bantugang mga Protestante, sama nila ni Bayle, basnage, Blondel, Burnet, Bochart, Cave, Chamer, Casaubon, Domoulin, Gibbon, Giesler, Leibnitz ug uban pa misalikway niini, nga kini usa lang ka istorya nga mimao-mao sa mga tawo.

Sa mga tuig nga gihisgotan sa pagmando sa babaye nga papa, si Joana; dunay mga lalaki nga Papa nga nagmando. Si Papa Leo IV namatay sa Julio 15, 855 A.D. ug gisundan dayon ni Papa Benedicto II sa tuig 855-858 A.D. ug walay kahaw-ang taliwala niining duha ka papa. Ug bahin sa laing petsa nga nagmando ang maong babaye nga papa, tuig 1100 A.D. duna say nagmando nga papa nga si Papa Pascual II sa tuig 1099 ngadto sa tuig 1118 A.D.

Ang taho bahin sa pagpadagan nga duna gayoy papa nga babaye maoy usa ka kalihokan sa mga Protestante aron sa pagpahid ug lapok sa lista sa mga Papa diha sa kasaysayan. (Question Box by Rev. Bertrand Conway, pahina 160-161).

Posted in Apologetics-Visayan, Santo Papa, Socrates C. Fernandez, SUKNAAN (Visaya) | Leave a Comment »

SUKNAAN (KALUWASAN)

Posted by catholicfaithdefender on March 11, 2009

SUKNAAN

Ni Bro. Socrates C. Fernandez

Topic: Kaluwasan

PANGUTANA:

Sa unbang tinuhoan sayon ra ang kaluwasan, “Tumuo ka ni Jesucristo maluwas ka..” (Buhat 16: 31). Unsa man ang mga paagi sa katoliko aron maluwas ang ilang mga kalag?

TUBAG:

Ang panudlo sa Iglesya Katolika bahin sa kaluwasan gipasukad sa Doktrina ni Jesu-Cristo:

1.) Motoo sa 12 ka Artikulo sa Creed. “Ug nahibulong sila sa pagtulun-an ni Jesucristo ka Siya nagtudlo kanila nga adunay kagahuman dili sama sa Eskriba” (Marcos 1: 22).

2.) Ang paghinulsol ug pagbiya sa sala. Si Jesus miingon niadtong tawo nga Iyang giayo, “Karon kay mayo ka naman, ayaw na pagpakasala aron dili mahitabo kanimo ang mas mangil-ad pa nga mga butang.” (Juan 5: 14).

3.) Ang pagtuman sa sugo. Miingon si Cristo niadtong datu nga tawo, “Kun buot ka mosulod sa kinabuhi nga walay katapusan, tumana ang mga sugo” (Mat. 19:17).

4.) Pagpasakop sa matuod nga Iglesia, “kay walay matuod nga kristohanong tinuboan kun mahibulag kita sa tinuod nga Iglesya” (Col. 2: 19).

5.) Salig sa Iyang grasya, ang pagdawat sa mga Sakramento ug pagkalawat sa lawas ug Dugo ni Jesucristo. (San Juan 6:51-56).

6.) Ang pagpaambit sa pagtulun-an ni Jesucristo alang sa kaluwasan ngadto sa uban. Pagtabang sa mga kabus sa kainahanglang material. (1 Tim. 4:13-16).

7.) Ang paglahutay hangtod sa katapusan (Mat 24: 13).

Posted in Apologetics-Visayan, KALUWASAN (Visaya), Socrates C. Fernandez, SUKNAAN (Visaya) | Leave a Comment »

SUKNAAN (January 11, 2009)

Posted by catholicfaithdefender on March 3, 2009

SUKNAAN

Ni Bro. Socrates C. Fernandez

Date: January 11, 2009

Source: Bag-ong LUNGSORANON, Page 8

Topic: Bunyag

PANGUTANA:

Sa Bibliya si Jesus nag-ingon: “Tudloi ang tanang mga binuhat sa Akong Maayong Balita, ang motuo ug magpabunyag maluwas…” (San Markos 16:15-16). Dagko na ang bunyagan kay tudloan man una. Si San Pedro miingon, “Paghinulsol kamo ug magpabunyag aron mapasaylo ang inyong mga sala ug makadawat kamo sa Espiritu Santo,” (Buhat 2:38). “Ang mga bata nga wala mangatawo wala pa usab magabuhat og dautan,” (Roma 9:11). Tungod niini dagko na gayud ang angay bunyagan dili gagmay’ng mga bata. Nganong gisupak man kini sa Katoliko?

TUBAG:

Apil sa kabubut-on sa Dios ang pagbunyag sa gagmay’ng mga bata. Ngano man? Tungod kay ang gagmay’ng mga bata didto pa sa sulod sa tiyan sa ilang inahan nakaambit na sa sala sa atong ginikanan. Kini gitawag og sala nga panulondon. “Bisan ang among amahan sila namatay na apan kami nakapanunod sa iyang kasal-anan,” (Pagbangotan 5:7). Si David miingon, “Ako gipanamkon sa sala ug makasasala na ako didto pa ako sa tiyan sa akong inahan,” (Sal. 51:5). Ang atong mga ginikanan nahimo nga mahugaw sa sala. Si Job, “Si kinsa ba ang makakuha og limpyo gikan sa mahugaw walay mausa,” (Job 14:4), “Kon ang natawo sa usa ka babaye unsaon niya sa pagkahinlo,” (Job 25:4). Si Birhen Maria lamang ang nahigawas sa sala nga panulondon, tungod kay nahimo man siya nga sudlanan sa Balaang Manunubos. “Ang akong esposa putli ug walay buling diha kaniya,” (Awit 4:7).

Kaniadto ang mga batang lalaki nga walo ka adlaw ang edad sirkunsisyonan, aron ang bata mahimo nga anak sa Dios ug ang Dios mahimo nga iyang Amahan (Gen. 17:13-14). Masuso pa ang mga bata gihimo na nga Anak sa Dios, dili pa siya makasabot, dili pa siya katudloan. Ug si San Palo nagpasabot sa bunyag nga mao ang sirkunsisyon nga wala buhata sa kamot… nga sa gilubong kamo uban Kaniya diha sa bautismo ug gibanhaw uasab kamo uban Kaniya” (Colosas 2:11-12).

Ang Dios Amahan sa Daang Tugon nagbunyag apil ang gagmay’ng mga bata: “Ang mga anak sa Israel mipanaw gikan sa Rameses paduong ngadto sa Succoth nga may unom ka gatus ka libo ka mga lalaki nga naglakaw gawas sa mga bata,” (Exudos 12:37). Apil sa maong panaw ang mga babaye ug mga bata nga wala lang iapil sa maong pag-ihap. “Ang tanan kang Moises gibautismohan didto sa panganud ug didto sa dagat,” (1 Cor. 10:2). Sa maong pagbunyag nahiapil ang mga gagmay’ng bata. Ug si San Pedro sa iyang awhag ang pagbunyag mahiapil ang mga bata, paghinulsol kamo ug magpabunyag aron kamo makadawat sa pasaylo sa inyong mga sala… kining saara dili lang kaninyo kondili alang usab sa inyong mga kabataan,” (Buhat 2:38-39). Ug ang pulong kabataan sa Griego teknois ug ang inusa (singular) teknon, ang kahulugan niini “Little child”. Busa apil gayod diay sa plano sa Dios ang pagbunyag sa gagmay’ng mga bata. Ang mga dagko na nga pagano nga tudloan una ug pahinulsol una pa sila pagabunyagi.

Posted in Apologetics-Visayan, Bunyag (Visaya), Socrates C. Fernandez, SUKNAAN (Visaya) | Leave a Comment »

SUKNAAN (October 12, 2008)

Posted by catholicfaithdefender on March 3, 2009

SUKNAAN

Ni Bro. Socrates C. Fernandez

Date: October 12, 2008

Source: Bag-ong LUNGSORANON, Page 8

Topic: Ngalan sa Amahan

PANGUTANA:

Tinuod ba nga ang Yahweh, ngalan sa Amahan mahanaw na sa pag-abot sa ngalan ni Jesus, kay ang Jesus mao ang ngalan sa Amahan nga gihatag Niya kang Jesus: Ako mianhi sa ngalan sa Akong Amahan…” (Juan 5:43). “bantayi sila pinaagi sa Imong ngalan nga gihatag mo Kanako,” (Juan 17:11). “Ako nanumpa, nga ang Akong dakong ngalan, nag-ingon si Yahweh dili litokon sa kang bisan kinsang tawo sa Juda…” (Jer. 44:26)?

TUBAG:

Ang gipasabot sa giingon nga dili pagahisgotan ang ngalan nga Yahweh, mao ang mga Judio didto lang sa Ehipto. “Kamo nga mga Judio nga nagpuyo sa Ehipto, “Ako nanumpa nga ang akong dakong ngalan nag-ingon si Yahweh dili litokon kang bisan kinsang tawo sa Juda.” (Jer. 44:26). Wala magpasabot nga dili mahisgotan sa ubang dapit. Sa Ehipto kay dunay templo sa ilang dios nga si Ra, dios nga adlaw kun Heliopolis duol sa Cairo.

Ang Dios misulti kang Moises, “Ngadto kang Abraham, Isaac ug ni Jacob mipaila Ako kanila, nga mao ang El Shaddai. Wala ko ipaila kanila ang Akong ngalan nga Yahweh… ug dakungog ko ang agulo sa akong mga anak diha sa ilang pagka-ulipon sa Ehipto.”

Ang Dios misulti pinaagi sa Anghel. “Pagatawgon mo ang Iyang ngalan ug JESUS” (Mat. 1:21). Ang Jesus sa orihinal, mao ang “Yah-shuah” o “Yeh-shua,” ang Yah o Yeh mao ang sinugdanan sa pulong nga Yahweh.

Dili pagasabton nga nawala na ang ngalan nga Yahweh. Ania ang gipamulong sa DIOS, “Si Yahweh ang Dios sa mga ginikanan. This is my name for all time; by this name I shall be invoked for all generations to come,” (Exodus 3:15, Jerusalem Bible).

Dili mahitabo nga mahanaw na ang ngalan ni Yahweh. “Yahweh will be unique and His name is unique” (Zac 14:2). “Usa ra si Yahweh ug usa ra ang Iyang ngalan.”

Posted in Apologetics-Visayan, Socrates C. Fernandez, SUKNAAN (Visaya) | Leave a Comment »

SUKNAAN (August 24, 2008)

Posted by catholicfaithdefender on February 26, 2009

SUKNAAN

Ni Bro. Socrates C. Fernandez

Date: August 24, 2008

Source: Bag-ong LUNGSORANON, Page 6

Topic: Trinidad ug Purgatoryo

PANGUTANA:

DILI ba ang panudlo sa Kasulatan mao ang doktrina kinahanglan nga mabasa sa Biblia kay matud pa ni San Pablo; “sa dili pagbaton og hunahuna nga kapin sa mga butang nga nahasulat,” (1 Cor. 4:6). “Kon may tawo nga naghunahuna nga siya manalagna kun espirituhanon, pailha siya sa mga butang nga gisulat Ko kaninyo nga kini sila sugo sa Ginoo,” (1 Cor. 14:37). Pero, usa ka pari nag-ingon, “Maingon nga ang Pulong Trinidad dili mabasa sa Bibliya mao usab ang pulong Purgatoryo dili mabasa sa Bibliya.” Busa, ang doktrina sa Purgatoryo dako diay nga supak sa Ginoo, dili ba?

TUBAG:

Sa atong pagsabot sa Bibliya dunay duha ka paagi, una ang gitawag og DEFINITUS kun Explicit, dali Makita ang kahulugan pinaagi sa mabasa letra por letra. Ang ikaduha mao ang gitawag nga IMPLICATIO kun Implicit. Dili nato Makita dayon ang kahulogan kay dili man mabasa letra por letra, apan masabtan pinaagi sa naglimin nga kahulogan.

Ang pananglit sa Definitus kun Explicit, kun pruybahon nga si Cristo, Dios letra por letra: “Kay nagpaabot kita sa bulahan nga pagpadayag sa atong dakong Dios ug Manluluwas nga si Cristo: nga mihatag sa iyang kaugalingon alang kanato…” (Tito 2:13-14). Ang pagpruyba nga si Cristo Dios sa paagi nga IMPLICATIO mao ang Iyang pagbuhi og minatay, kang Lazaro. Wala siya moingon nga Siya Dios apan sayod nga makabuhi og patay sa Iyang kaugalingong gahom mao ang Dios (Deut. 32:39). “Ako mao ang Dios, Ako ang magkahatag og kinabuhi ug Ako usab ang makapatay sa tawo”.

Laing pruyba sa IMPLICATIO kun implicit mao ang pagtagna bahin sa manglupad nga puthaw ang ayroplano: “Ang Iyang mga caroo sama sa alimpuos…” (Jer. 4:13). Ang kanhi nga mga caroo sa gubat hinimo’g puthaw.

Ang Purgatoryo anaa sa kategoriya nga IMPLICATIO kun Implicit dili letra por letra apan matin-aw kon sabton ang iyang kahulogan. Kay ang Dios mosilot sa kasal-anan sa tawo agad sa gidak-on o gigamyon sa maong sala. Kon dako ang sala, dako usab ang isilot kon gamay ra ang sala, gamay ra usab ang isilot (Lukas 12:47-48).

Ug kadtong mga nangamatay nga gamay ra ang sala, wala kini mahinulsoli, silotan sila apan adto sa silot nga makagawas pa sila human sila malimpiyohi. “Kon ang buhat ni bisan kinsa mahulog sa kapildihan walay dapayan nga moagi og kalayo apan maluwas pa siya,” (1 Cor. 3:15). Ug ang maong mga kalag katabangan pa sa atong mga pag-ampo: “Kay balaanon ug makaluwas ang pag-ampo alang sa mga nangamatay aron sila mabadbaran sa ilang mga sala,” (2 Macabeo 12:45). “Ug human nila mabayri ang diriyut nila nga sala makagawas pa sa sila sa prisohan,” (Mat. 5:26). Kay may sala nga mapasaylo pa sa sunod nga kinabuhi (Mat. 12:32).

Posted in Apologetics-Visayan, Purgatoryo (Visaya), Socrates C. Fernandez, SUKNAAN (Visaya) | Leave a Comment »

SUKNAAN (December 14, 2008)

Posted by catholicfaithdefender on February 26, 2009

SUKNAAN

Ni Bro. Socrates C. Fernandez

Date: December 14, 2008

Source: Bag-ong LUNGSORANON, Page 8

Topic: Eyukaristia ug Larawan

PANGUTANA:

Nabati ko kanimo Bro. Soc, nga nag-ingon ka, nga ang Eyukaristia kun Pagkalawat mao gayud kini ang tinuod nga unod ni Cristo. Kining Ostiya, pero dili ba kini material man lang? Ug miingon ka sab nga ang balay sa Dios dunay mga larawan nga linilok nga gipahimo sa Dios, apan dili ba usab kini material man lang? Wala ba ka makasupak sa pulong ni Jesus nga nag-ingon: “Ang espiritu mao ang naghatag og kinabuhi: ang unod walay kapuslanan bisan unsa: ang mga pulong nga akong gisulti kaninyo mao ang espiritu, ug ang kinabuhi,” (Juan 6:6)? Ricardo Cañabo, Santa Lucia Gate, Bulacao, Talisay City, Cebu.

TUBAG:

Wala ako makasupak sa mga pulong ni Cristo nga atong Ginoo. Kay ang buot ipasabot nianang unod nga walay kapuslanan bisan unsa… ang unod nagpasabot sa tawo miingon si Jesus kang Pedro: “Bulahan ka Simon… kay wala kini ipadayag sa unod ug dugo…” (Mat. 16:17 KJV) sabton tawo. Kini gahom sa Ginoo sa pagbalhin sa pan ug bino aron mahimo kini nga unod ug dugo ni Cristo dili kini mahimo sa gahom sa tawo. Apan mahimo kini sa Pulong sa Dios… “Kay walay pulong sa Dios nga mawad-an og gahom” (Lukas 1:37). “Akong ibungat ang akong pulong ug matuman niana,” (Ezek. 12:25). Ang patay’ng Lazaro gisinggitan ni Jesus sa Iyang tingog ug pulong… “Lazaro, umari ka sa gawas,” (Juan 11:43). Si Lazaro, nabuhi.

Ang tubig sa Kasal sa Cana, gibungat ni Jesus ang pulong nahimo kini nga bino (Juan 2:1-4). “Pinaagi sa mga Pulong sa Ginoo nabbuhat ang Langit ug ang Yuta,” (Sal. 33:6). Ug mga pulong ni Jesus nga atong Ginoo, nga migunit sa pan sa pag-ingon, “Kini mao ang akong lawas, nga hinatag tungod kaninyo; buhata ninyo kini nga handumanan Kanako. Ug miingon usab: Kini mahitabo nga ang pan ug bino mahimo nga unod ug dugo ni Cristo, kay si Cristo dili man magbakak (1 Pedro 2:22).

The Ark of the Covenant

Sa Templo sa Dios, ang Amahan mismo namulong kang Moises, “Magpabuhat ka og duha ka larawan nga sinalsal sa duha ka kerubin ug ibutang mo sila sa masigka-kilid sa altar. Sulod sa Akong Templo may altar ug butangi ug linilok nga mga larawan sa kerubin sa dagway sa tawo, sa larawan sa batan-ong liyon…” (Exo. 25:18-22, Eze. 41:18-22). Ang Dios dili maghatag himaya sa mga larawan sa mga dios-dios, (Isa. 42:8). Apan Siya maghatag og himaya sa balaang larawan sa kerubin. Diha nga gikawat kini sa mga Felisteo, ug gitupad kang Dragon, ilang dios-dios, nahagba kini ug nagubok (1 Sam 5:1-6). Ug ang Dios misaad niini, “Dios nga si Yahweh nga nagpahiluna ibabaw sa kerubin,” (1 Cronicas 13:6)… Busa tungod kay kini mga pulong sa Dios, nan, matarung ug angay nga ilhon kini nga pinaluyohan sa espiritu sa Dios, dili material lamang.

Posted in Apologetics-Visayan, Eyukaristia (Visaya), Larawan (Visaya), Misa, Socrates C. Fernandez, SUKNAAN (Visaya) | 2 Comments »

SUKNAAN (February 15, 2009)

Posted by catholicfaithdefender on February 12, 2009

SUKNAAN

Ni Bro. Socrates C. Fernandez

Date: February 15, 2009

PANGUTANA:

Giingon nga ang Dios, dili mausab (Malaquias 3:6), pero ngano man nga dinhay higayon nga ang Dios nagdili sa pagkaon sa bisan unsa nga karne, “Apan ang unod, uban ang kinabuhi niini nga mao ang dugo, dili ninyo pagakan-on,” (Gen. 9:4). Unya may gidili nga karne, apan ang uban makaon sama sa unod sa baka, kanding, karnero… (Lev. 11:1-36). Unya miabot ang panahon nga ipakaon na gayud ang tanang unod o karne (Mar. 7:18-19). Kay limpiyo na ang tanang makaon. Unya dinhay panahon nga gidili sa Dios sa pagbuhat og bisan unsa nga linilok nga larawan (Exudos 20:3-5). Unya miabot na sab ang panahon nga ang Dios nagpahimo na sab ug linilok nga larawan sa kerubin (Exudos 25:18-22). Dili ba klaro nga ang Dios nag-usab-usab? (Dan Cugtas)

TUBAG:

Ang Dios sa Iyang kahimtang ug sa Iyang pagka-Dios, dili mausab. Apan mausab ang iyang pagdumala sa katawhan. Iagad sa tuyo sa Dios aron sa pag-agak sa tawo ngadto sa husto nga dalan sa kinabuhi nga magahatud ngadto Kaniya. Kaniadto makalilisang ang paghunos sa kinabuhi sa tawo, busa giganoy sa Dios ang tawo sa dili paghunos sa kinabuhi bisan sa mananap o sa pagkaon sa iyang unod lakip sa dugo. “Kay sa pagkatinuod gayud, ang dugo sa inyong kinabuhi pagapanilngon Ko, sa kamot nga moihaw sa tanang mga mananap pagapanilngon ko kini,” (Hen. 9:5).

Unya sa pag-abot sa panahon, sa pagkinahanglan sa tawo sa karne, gibalaod sa Dios nga makaon kini gawas niadtong giisip nga unod nga dili hinlo. “Aron maila ninyo ang kalainan sa makaon nga hugaw ug sa pagkaon nga hinlo,” (Lev. 10:10). Apan sa diha nga giila ang pagpugong sa pagkaon nga gidili maoy gipalabi kay sa pagpakasala, gihinloan sa Dios ang kahugaw sa mga mananap kaniadto nga dili hinlo, ug gipahimug-atan sa Dios, nga ang sala batok sa 10 ka sugo mao ang matuod nga makahugaw sa kalag sa tawo. “Ang kalan-on gikan sa gawas mosulod sa tawo dili moagi sa kasingkasing ug padulong sa tiyan. Kini dili makahugaw ninyo. Ang makahugaw mao ang dautang pulong, ang pagpatay ug paghimog kalaw-ayan. Gikan karon nagmalinis na ang tanang pagkaon,” (Mar. 7:18-19).

May mga larawan nga gidili na gayud sa Dios, ang mga larawan sa bakak nga Dios.. “Timan-I ninyo sa pagtuman sa dili paghimo sa mga linilok nga akong gidili,” (Deut. 4:23). “Dili kamo magbuhat alang kaninyo og mga dios-dios ug uban pa.” (Lev. 26:1). Apan ang mga linilok sa balaan nga gipahimo sa Dios, dili kini dios-dios “Ipahiluna sa Templo sa Dios, ang larawang linilok sa kerubin sa dagway sa tawo ug sa batan-ong liyon,” (Ezek. 41:18-22). Inagda niini, ang pagtahud sa Sanctuario sa Dios (Lev. 19:30). Ug giyukboan kini sa tawo sa Dios, si Josue (Josue 7:6). Ug giprosesyon sa katawhan sa Dios ang larawan sa kerubin ug giluwas sila sa Dios (Josue 6:1-6). Si David misayaw atubangan sa larawan sa kerubin (2 Sam. 6:14-16). Kini aron sa pagpasabot nga ang katawhan sa Dios makaila kon unsay dios-dios ug unsay balaang larawan nga gipahimo sa Dios. “Ang dautan dili makasabot apan ang manggialamon makasabot niini” (Dan. 12:10).

Posted in Apologetics-Visayan, Socrates C. Fernandez, SUKNAAN (Visaya) | Leave a Comment »

 
Follow

Get every new post delivered to your Inbox.

Join 52 other followers